Колапс на воздушниот сообраќај кон Блискиот Исток, откажани над 1.000 летови од утрово

2026-03-02 - 08:28

Повеќе од 1.000 летови до дестинации на Блискиот Исток беа откажани денес поради американско-израелската војна против Иран и одмаздничките акции, а главните аеродроми, вклучувајќи го и Дубаи, кој е најпрометниот меѓународен центар во светот, беа затворени трет ден по ред, објавува „The Guardian“. Според најновите податоци, до утрово веќе беа откажани 1.239 летови, а само Emirates Airlines, со седиште во Дубаи, Etihad Airways, со седиште во Абу Даби и Qatar Airways, со седиште во Доха, заедно откажаа стотици летови. Други превозници откажаа услуги низ регионот, а Air India вчера откажа летови од Њу Делхи, Мумбаи и Амритсар до големите градови во Европа и Северна Америка. Речиси 2.800 летови беа откажани во саботата, кога започна американско-израелскиот напад врз Иран, а 3.156 летови беа откажани вчера, според платформата за следење FlightAware. Воздушниот простор над Иран, Ирак, Кувајт, Израел, Бахреин, Обединетите Арапски Емирати и Катар останува практично празен, според веб-страницата за следење летови Flightradar24. Влијанието на војната во Иран и одмаздничките напади на Иран врз Израел и цели во околните земји се прошири далеку надвор од Блискиот Исток, со патници кои останаа блокирани од Бали до Франкфурт. Извршниот директор на брокерската куќа за приватни авиони „Вимана Прајват Семафор“, Амир Наран, рече дека „Саудиска Арабија е единствената вистинска опција за луѓето кои сакаат веднаш да го напуштат регионот“ на Блискиот Исток.