Трамп бара помош од Курдите да се вклучат во војната против Иран

2026-03-03 - 10:08

Американскиот претседател Доналд Трамп во неделата телефонски разговарал со курдските лидери во Ирак за американско-израелската војна со Иран и можните понатамошни случувања, потврдија за американскиот портал „Аксиос“ три извори запознаени со повиците. Како што наведува американскиот портал Трамп контактирал со лидерите на двете главни курдски фракции во Ирак, Масуд Барзани и Бафел Талабани, еден ден откако започна бомбардирањето во саботата, објави „Аксиос“. Курдите имаат илјадници борци по должината на границата меѓу Ирак и Иран и контролираат стратешки области што би можеле да станат клучни во текот на војната. Покрај тоа, ирачките Курди одржуваат блиски врски со курдското малцинство во Иран. Телефонските повици следеа по месеци лобирање од страна на израелскиот премиер Бенјамин Нетанјаху, кој го повика Трамп да нападне и да предизвика промена на режимот во Иран. Израел со децении има блиски безбедносни, воени и разузнавачки врски со Курдите во Сирија, Ирак и Иран. Еден функционер рече: „Преовладувачкото мислење, а секако и мислењето на Нетанјаху, е дека Курдите ќе излезат од сенките... дека ќе се побунат“. Нетанјаху првпат ја изнесе идејата за вклучување на Курдите за време на состанокот со Трамп во Белата куќа. „Кога првпат дојде и седеше со Трамп со часови, се чинеше дека Нетанјаху сè решил“, рече еден функционер. „Тој имаше подготвен наследник. Тој знаеше сè за Курдите: што се двете групи, каде се. Тој исто така знаеше колку луѓе ќе се кренат во востанието“, додаде тој. Како што наведува порталот кога била директно прашана за повиците на Трамп до Курдите, портпаролката на Белата куќа, Каролин Ливит, одбила да коментира за деталите. „Претседателот Трамп во последните денови беше во контакт со голем број сојузници и партнери во регионот“, изјави таа за Аксиос. Во неделата, Курдската партија за слобода, опозициска група на ирански Курди со седиште во ирачки Курдистан, го обвини Иран за одмаздничка кампања со ракетни напади и напади со беспилотни летала. Шест дена пред почетокот на војната, пет дисидентски курдски групи кои дејствуваат од Ирак го објавија формирањето на коалицијата на политички сили на ирански Курдистан за борба против Иран. Вклучувањето на искусни борци на терен би додало клучна димензија на воздушната кампања на САД и Израел. САД користеа слична стратегија во војната во Авганистан во 2001 година, кога користеа силна воздушна поддршка за да ги унапредат борците на етничките малцинства на терен за да помогнат во соборувањето на режимот на Талибанците. Непријателскиот однос на Курдите со Турција, сојузник на САД и членка на НАТО, би можел да претставува проблем за овие планови. „Претседателот разговара со сите. Тој разговара со курдските лидери. Тој разговара и со турскиот претседател Ердоган“, рече еден извор. Најавата минатата недела за формирање на коалицијата на политички сили на ирански Курдистан, исто така, предизвика тензии со групата во егзил предводена од поранешниот ирански престолонаследник Реза Пахлави. Иако американските претставници веруваат дека Нетанјаху можеби го преценил бројот на Курди кои би биле подготвени да се борат против Иран, тие инсистираат дека бројот „не е занемарлив“. „Каква би била нивната улога во војна или повоен Иран, тоа е прашање надвор од моите овластувања“, заклучи еден функционер.