Расколот во СДСМ продолжува: Градоначалникот на Крива Паланка во јавна преписка со партиски член

2026-03-26 - 11:13

Внатрешните тензии во редовите на СДСМ продолжуваат да излегуваат на површина, овојпат преку јавна преписка на социјалните мрежи меѓу градоначалникот на Крива Паланка, Сашко Митовски, и партискиот член Димитар Шошев. Во објава која предизвика реакции, Митовски остро му се обрати на Шошев, порачувајќи му да не се впушта во јавни коментари за теми за кои, како што наведува, „нема основни познавања“. Притоа, градоначалникот алудира и на внатрепартиски несогласувања, посочувајќи дека „подобро е јавно да не се отвораат теми“ поврзани со изборите и довербата од граѓаните и партијата. Во истата комуникација, Митовски изразува незадоволство од поддршката што ја добил од партијата во минатото, оценувајќи дека тоа ќе има последици врз политичкиот резултат во општината. Од друга страна, Шошев возврати обвинувајќи дека ваквиот пристап претставува обид за замолчување и ограничување на правото на јавно изразување. Овој јавен судир е само уште еден во низата слични преписки меѓу членови и функционери на СДСМ во изминатиот период, кои се одвиваат пред очите на јавноста и укажуваат на продлабочување на внатрепартискиот раскол. Политичките аналитичари веќе подолго време предупредуваат дека ваквите јавни конфронтации ја нарушуваат перцепцијата за единство во партијата и може да имаат директно влијание врз нејзиниот рејтинг на терен. Пукнатината станува јаз – СДСМ во фаза на политичко распарчување